Сайтка кириу

O’zLiDeP: БИР МАҚСЕТ БИРЛЕСТИРЕДИ

OzLiDeP: БИР МАҚСЕТ БИРЛЕСТИРЕДИ

Бердақ атындағы Қарақалпақ мәмлекетлик университетиниң бас майданшасында Исбилерменлер ҳәрекети — Өзбекстан Либерал-демократиялық партиясы Қарақалпақстан Республикалық Кеңеси тәрепинен «Жарқын келешекти O’zLiDeP пенен бирге қурамыз!» ураны астында «O’zLiDeP — өз мақсет ҳәм ўазыйпаларын халқымыз бенен бирге әмелге асырады» атамасында жаслар акциясы болып өтти.

Оған Өзбекстан Республикасы Суў хожалығы министри Ш.Хамраев, Қарақалпақстан Республикасы Жоқарғы Кеңесиниң комитет баслығы, партияның Қарақалпақстан Республикалық Кеңесиниң баслығы С.Турманов, депутатлар, исбилерменлер, халқымызға белгили мәденият тараўы хызметкерлери, партия белсендилери, жаслар ҳәм ғалаба хабар қуралларының хызметкерлери қатнасты.

– Быйылғы сайлаўлар алдыңғы сайлаўлардан пүткиллей парықланады, –дейди O’zLiDeP Қарақалпақстан Республикалық Кеңесиниң баслығы С.Турманов. – Жаңа Сайлаў кодекси тийкарында шөлкемлестирилетуғын быйылғы сайлаў «Жаңа Өзбекстан-жаңа сайлаўлар!» ураны  астында өткерилип, бул ҳәрекет етип турған бес сиясий партияға, соның қатарында O’zLiDeP  ағзаларына да үлкен жуўапкершиликти жүклейди.

Илажды өткериўден тийкарғы мақсет – партияның мақсет ҳәм ўазыйпаларын кең жәмийетшиликке, әсиресе жаслар арасында үгит-нәсиятлаў, мәмлекетимиз турмысында сайлаўлардың тутқан орнын түсиндириў, жаслардың бос ўақытларын мазмунлы өткериў, түрли акция ҳәм үгит-нәсият илажлары арқалы партияның алып барып атырған жумысларын таныстырыў, сайлаўларда жаслардың белсене қатнасыўын тәмийинлеўден ибарат.

Себеби, алдыңғы сайлаўлар 5 нызам ҳәм 40 қа шамалас нызамнан келип шығатуғын ҳүжжетлерге тийкарланып әмелге асырылған болса, быйылғы сайлаўда тийкарғы сүйенетуғын ҳүжжет бул – Өзбекстан Республикасының Сайлаў кодекси, Қарақалпақстан Республикасының «Сайлаў ҳаққында»ғы нызамы ҳәм басқа да сайлаўға байланыслы қабыл етилген ҳүжжетлер болып есапланады.

– Бүгинги, партия тәрепинен өткерилип атырған жаслар акциясы менде үлкен тәсир қалдырды, – дейди университтиң санаат технологиясы факультетиниң студенти Г.Жалғасова.

– Партия тәрепинен бундай сайлаўалды акция ҳәм үгит-нәсият илажларының өткерилиўи ўатанымыздың еле де раўажланыўы ҳәм халқымыздың пәраўанлығын тәмийинлеўге хызмет етеди. Жасларды болажақ сайлаўларға белсене қатнасыўға шақырып қаламан.

Акция шеңберинде жаслар арасында интерактив тәризиндеги сораў-жуўап ойынлары өткерилип, көркем өнер шеберлери атқарыўындағы концерт бағдарламасы қойып берилди.