Сайтка кириу

«ТАШАББУС» ТАҢЛАЎЫНЫҢ НӨКИС ҚАЛАЛЫҚ БАСҚЫШЫ ӨТКЕРИЛДИ

«ТАШАББУС» ТАҢЛАЎЫНЫҢ НӨКИС ҚАЛАЛЫҚ

БАСҚЫШЫ ӨТКЕРИЛДИ

Мине, 23 жыл даўамында исбилерменлер, фермерлер ҳәм өнерментлер арасында «Ташаббус» таңлаўы өткерилмекте.

Усы дәстүр быйыл да даўам еттирилип, 2018-жылдың жуўмақлары бойынша «Ташаббус-2019» таңлаўын өткериў бойынша Өзбекстан Республикасы Министрлер Кабинетиниң усы жыл 14-апрельдеги ҳәм Қарақалпақстан Республикасы Министрлер Кеңесиниң 19-апрельдеги бийлиги қабыл етилди.

«Ташаббус» таңлаў-жарысы мәмлекетимиз экономикасында болып атырған унамлы өзгерислерди көрсететуғын тийкарғы ўақыялардан есапланып, киши бизнес ҳәм жеке исбилерменликти қоллап-қуўатлаўда, оларды хошаметлеўде үлкен әҳмийетке ийе.

Таңлаў-жарысын өткериўден тийкарғы мақсет – аймақларда киши бизнес ҳәм жеке исбилерменликтиң жедел раўажланыўын хошаметлейтуғын бизнес орталығын қәлиплестириў, мәмлекет экономикасында жеке сектордың үлесин ҳәм әҳмийетин арттырыў, исбилерменлердиң кәсиплик шеберлигин ҳәм билим дәрежесин жоқарылатыў ушын зәрүр шараятлар жаратыў, исбилерменлик жумысындағы алдыңғы тәжирийбелерди ғалаба ен жайдырыў, олардың арасында хожалық байланысларын кеңейтиў ҳәм ислеп шығарып атырған өнимлерин дағазалаўға, исбилерменлик жумысында корпоративлик басқарыў принциплерин енгизиўге жәрдемлесиў болып есапланады.

Быйылғы таңлаў тийкарынан «Cанаат тараўындағы ең жақсы исбилермен», «Хызмет көрсетиў тараўындағы ең жақсы исбилермен», «Ең жақсы жас исбилермен», «Ең жақсы фермер», «Ең жақсы өнермент» бағдарлары бойынша  өткерилмекте.

Жақында пайтахтымыздағы Жаслар орайында усы таңлаўдың Нөкис қалалық басқышы болып өтти. Оған, жәми 80 нен аслам киши бизнес, жеке исбилерменлер субъектлери ўәкиллери ҳәм өнерментлер қатнасты.

Илажда қатнасыўшылардың ислеп шығарған өнимлери көргизбелери менен бирге азық-аўқат ҳәм аўыл хожалығы өнимлериниң саўда ярмаркалары шөлкемлестирилди.

Онда Өзбекстан Саўда-санаат палатасының Қарақалпақстан Республикасы басқармасы баслығы А.Ибрагимов, Нөкис қаласы ҳәкиминиң биринши орынбасары Ш.Оспанов шығып сөйлеп, бул таңлаўға қатнасыўшылардың саны жылдан-жылға артып, исбилерменлик пенен шуғылланыўшы жаслар ҳәм ҳаял-қызлардың қатары көбейип баратырғанлығын айрықша атап өтти.

Нөкис қаласында киши бизнестиң  жалпы ишки өним ислеп шығарыўдағы үлеси 2018-жыл жуўмағында 47,3, санаатта 7,2, хызметлер көрсетиўде 44,7 процентти қурады. Сондай-ақ, мәмлекетимизде киши бизнес ҳәм жеке исбилерменликти қоллап-қуўатлаў, оларды ҳошаметлеў мақсетинде бир қанша таңлаўлар ҳәм  исбилерменлик субъектлери өнимлериниң көргизбелери шөлкемлестирилип келинбекте.

Таңлаўдың Нөкис қалалық басқышында «Санаат тараўындағы ең жақсы исбилермен» бағдары бойынша «Нукус алға қурылыс монтаж» ЖШЖ баслығы Дәўлетбай Қалхоразов, «Хызмет көрсетиў тараўындағы ең жақсы исбилермен» бағдары бойынша «Нукус Зияда Нур» оқыў орайының директоры Зияда Өтеназарова, «Ең жақсы жас исбилермен» бағдары бойынша «Нөкис лак бояўлары» ЖШЖ баслығы Асқар Артықов, «Ең жақсы өнермент» бағдары бойынша жеке исбилермен Ерсай Ибадуллаевлар биринши орынды ийеледи.  Жеңимпазлар шөлкемлестириўшилер тәрепинен таярланған арнаўлы диплом ҳәм естелик саўғалары менен сыйлықланып, таңлаўдың Қарақалпақстан Республикалық басқышына жоллама алды.

Еслетип өтемиз,  усы жыл 31-май күни 1-санлы Балалар ҳәм жас өспиримлер спорт мектебинде «Ташаббус-2019» таңлаў-жарысының Қарақалпақстан Республикалық басқышы қатнасыўшыларының өнимлери көргизбеси шөлкемлестирилип, Бердақ атындағы Қарақалпақ мамлекетлик академиялық музыкалы театрында таңлаў жеңимпазларын сыйлықлаў мәресими болып өтеди.

Жеңимпазлар усы жылдың 20-21-июнь күнлери Ташкент қаласында болып өтетуғын финалы басқышына қатнасыў жолламасын қолға киргизеди.